بنادمْ كحلْ الراسْ……

2021-04-14T16:37:15+01:00
2021-04-14T16:37:18+01:00
كتاب واراء
14 أبريل 2021
بنادمْ كحلْ الراسْ……
رابط مختصر

ميدلت بريس.نت-زايد التجاني

راهْ الدنيا غدّاره
خويا عليك ب الصّبرْ
شحالْ من زيـنْ
زيـنو مدْفـون ف خـرْبه
وشحالْ من ويـلْ
عايش فْ الفيلاّ و الـقـصرْ

,,,,,,,,,,,,,,,,,,,,,,,,,,,
شي عايشْ هاني
يتمتّـعْ ب رْوايحْ الزهـرْ
أشي عايش مكرفـسْ
مع بْهايمو ، وريحة البْعـرْ
………………………
الصيّاده يْصيّدو
يتمتعو طولْ النهـارْ
والحْـيّاحه يحيّحـو
يفيقو لّـوحشْ
ويرميـوْ ب الحْجـرْ
,,,,,,,,,,,,,,,,,,,,,,,,
ليك الله
يا ليّ محرومْ من الصّغـرْ
لا الميمونْ تـكـعّـدْ
لا الخـيرْ جا ف الكْـبـرْ
إيلا غمّض العينْ تحسبو ناعـسْ 
أو قـلبو يكـدي
جمْـره من الجّـمـرْ
,,,,,,,,,,,,,,,,,,,,,,,,,
ليك الله أمولْ المْحايـنْ
ثوبْ ف صابونْ المْصايـبْ

والحكره تابْعاه
كيفْ ظلّـو
طولْ العمرْ
,,,,,,,,,,,,,,,,,,,,,,,,,
ليك اللهْ يالي يْعضّ سْنّـيهْ
مرضْ يعطيهْ ل مرْض
الجّرحْ إلى مْشى يـبْرى
يتحـكْ ب الظفـرْ
,,,,,,,,,,,,,,,,,,,,,,,,
شجـرْتنا اليابْـسه
يا العامْره بْ الشّوك
ما ليك ظلْ
ما تجودي ب التمـرْ
الرّاس إبقي راسْ ب الدماغ
ماشي ب الدّهنه والشعرْ
,,,,,,,,,,,,,,,,,,,,,,
مابيّ المكتوبْ لّي مكْـتوب
تهمْـني دْقة بـنادمْ
لّي يزرعْ الشوكْ
ويحْـرقْ المْطامـرْ
حْـكاية الذيبْ إلى جاعْ
و الكلبْ إلي جاهْ السّعـرْ

,,,,,,,,,,,,,,,,,,,,,,,,
شي ناسْ إيطلـّو م الفوقْ
ركّـبو المْخالبْ
يربّـيوْ ف الريشْ
بنادمْ إريّشوه فْ السما
كيفْ النـسرْ
,,,,,,,,,,,,,,,,,,,,,,,,
كحلْ الراسْ
يا كحـلْ الفعايلْ
يا معشوقْ الرشوه و السّرقه
يوم الصّهـدْ جايك جايكْ
الى ما كان اليوم
إجيك ف القبرْ
,,,,,,,,,,,,,,,,,,,,,,,,
بنادم يا كحل الراس
قلبك مظلامْ
لا نجمه تسْطع ف سْماه
ولا يـتبعو الضّو د الفجـرْ
هْـنيّه عل التنوفـيقْ هْـنيّه
تسبيحْ أو قرأنْ
أو قلبْ شيطانْ
تـبْـدا بْ الضحكه

وتختمْها بْ الغـدرْ
////////////
أ.زايد التجاني / بومية

error: Content is protected !!